မန္တလေးမြို့၊ မဟာမုနိဘုရားကြီး (၆၇)ကြိမ်မြောက် ဗုဒ္ဓပူဇနိယပွဲတော်ကြီး၏(ဆဌမ)အကြိမ် ဓမ္မပူဇာသဘင် တရားပွဲတော်ကြီးကို လာမည့် ဇန်နဝါရီ ၂၇ရက်မှ ၂၉ရက်နေ့အထိ (၃)ရက် တိုင်တိုင် ဆင်ယင်ကျင်းပမည်ဖြစ်ကြောင်း ဂေါပကအဖွဲ့မှ ထုတ်ပြန်သည်။ ပါမောက္ခချုပ်ဆရာတော်ကြီးသည် ဇန်နဝါရီ၂၈ရက်နေ့ တရားပွဲသို့ ကြွရောက်၍ တရားဟောကြားတော်မူရန် မူလအစီအစဉ်ရှိခဲ့သော်လည်း အကြောင်းကြောင်းကြောင့် မကြွရောက်ဖြစ်တော့၍ သီတဂူဆရာတော်ကြီးက အစားထိုးကြွရောက်ချီးမြှင့်ပေးတော်မူမည်ဖြစ်သည်။တရားမဏ္ဍပ်တည်နေရာမှာ ဘုရားကြီးနာရီစင်၊ နိဗ္ဗာန်လမ်းတွင် အထက်ပါသုံးရက်တွင် ညနေ၅နာရီအချိန်၌ တရားပွဲစတင်မည်ဖြစ်သည်။တရားတော်များ လာရောက်ဟောကြားချီးမြှင့်ပေးတော်မူမည့် ဆရာတော်ကြီးများမှာ ဇန်နဝါရီ ၂၇ရက်တွင် မစိုးရိမ်တိုက်သစ်၊ မဟာနာယကဆရာတော်ကြီး ဘဒ္ဒန္တဝါသေဠာဘိဝံသ၊ ဇန်နဝါရီ ၂၈ရက်နှင့် ၂၉ရက်တို့တွင် သီတဂူဆရာတော်ကြီး ဒေါက်တာ ဘဒ္ဒန္တ ဉာဏိဿရ ဖြစ်သည်။
