ထိုင်းအစိုးရက နိုင်ငံခြားစီးပွားရေးလုပ်ငန်းရှင်တွေကြား ခေတ်စားနေတဲ့ "အမည်ခံ" (Nominee) စနစ်ကို အမြစ်ဖြတ်ဖို့ စီမံချက်ကြီးတစ်ခု စတင်လိုက်ပါပြီ။ စီးပွားရေးဝန်ကြီးဌာနနဲ့ အခြားအစိုးရအေဂျင်စီ ၁၇ ခု ပူးပေါင်းပြီး ထိုင်းနိုင်ငံသားအမည်ခံကာ မြေယာနဲ့ ပိုင်ဆိုင်မှုတွေ ဝယ်ယူထားတဲ့ နိုင်ငံခြားသားတွေကို ပိုက်စိပ်တိုက် ရှာဖွေတော့မှာ ဖြစ်ပါတယ်။ လက်ရှိမှာတော့ ဥပဒေချိုးဖောက်တယ်လို့ သံသယရှိဖွယ် ကုမ္ပဏီပေါင်း ၂၁,၄၅၉ ခုကို ပစ်မှတ်ထား စစ်ဆေးနေပြီ ဖြစ်ပါတယ်။ဒီစစ်ဆေးမှုတွေကို Department of Business Development (DBD) က ဦးဆောင်နေပြီး နည်းပညာနဲ့ ဒေတာဘေ့စ်တွေကို အသုံးပြုကာ ပိုင်ဆိုင်မှုလမ်းကြောင်းတွေကို ခြေရာခံမှာပါ။ ဥပဒေအရ နိုင်ငံခြားသားတွေ ပိုင်ဆိုင်ခွင့်မရှိတဲ့ မြေယာနဲ့ အိမ်ခြံမြေတွေကို ထိုင်းနိုင်ငံသားတွေ အမည်ခံပြီး ဝယ်ယူပေးထားတာတွေ၊ ဥပဒေကို မျက်လှည့်ပြပြီး လုပ်ကိုင်နေတာတွေကို တားဆီးဖို့ ရည်ရွယ်တာ ဖြစ်ပါတယ်။ ဒါဟာ နိုင်ငံရဲ့ စီးပွားရေးတည်ငြိမ်မှုကို ကာကွယ်ဖို့နဲ့ တရားမျှတတဲ့ စီးပွားရေးဝန်းကျင်တစ်ခု ဖန်တီးဖို့ ကြိုးပမ်းချက်လည်း ဖြစ်ပါတယ်။ဥပဒေချိုးဖောက်တာ တွေ့ရှိရရင်တော့ ပြစ်ဒဏ်တွေက မသေးလှပါဘူး။ အမည်ခံထားပေးတဲ့ ထိုင်းနိုင်ငံသားရော၊ နောက်ကွယ်က ခိုင်းစေတဲ့ နိုင်ငံခြားသားပါ Foreign Business Act (1999) အရ ထောင်ဒဏ် ၃ နှစ်အထိ ကျခံရနိုင်သလို ငွေဒဏ် ဘတ် ၁ သိန်းကနေ ၁ သန်းအထိ (သို့မဟုတ်) ဒဏ်နှစ်ရပ်စလုံး ချမှတ်ခံရနိုင်ပါတယ်။ ဒါ့အပြင် တရားရုံးအမိန့်မလိုက်နာမချင်း တစ်ရက်ကို ဒဏ်ကြေး ဘတ် ၁၀,၀၀၀ ကနေ ၅၀,၀၀၀ အထိ ထပ်ဆောင်းပေးဆောင်ရမှာ ဖြစ်ပါတယ်။စီးပွားရေးဝန်ကြီးဌာနက ပြည်သူတွေကို သတိပေးလိုက်တာကတော့ ကိုယ်ကျိုးစီးပွားအတွက် နိုင်ငံခြားသားတွေကို အမည်ခံပေးတာမျိုး လုံးဝမလုပ်ကြဖို့ပါပဲ။ အကယ်၍ ပါဝင်ပတ်သက်နေတာ စစ်ဆေးတွေ့ရှိရင် ကူညီပေးသူတွေပါ တာဝန်ခံရမှာဖြစ်ပြီး ဥပဒေအရ ပြင်းပြင်းထန်ထန် အရေးယူခံရမှာ ဖြစ်ကြောင်း သတိပေးထားပါတယ်။
