စိုက်ပျိုးရေးဘေးထွက်ပစ္စည်းများကို အာဟာရပြည့်ဝသော တိရစ္ဆာန်အစာအဖြစ် ပြောင်းလဲအသုံးပြုနိုင်မည့် နည်းပညာများ ဖြန့်ဝေမည်

မြန်မာနိုင်ငံတွင် ပေါများစွာထွက်ရှိသည့် ကောက်ရိုးနှင့် ပြောင်းရိုးကဲ့သို့သော စိုက်ပျိုးရေးဘေးထွက်ပစ္စည်းများကို အာဟာရတန်ဖိုးမြှင့်တင်ကာ တိရစ္ဆာန်အစာအဖြစ် အကျိုးရှိစွာ အသုံးပြုနိုင်မည့် စီမံကိန်းတစ်ရပ်ကို နေပြည်တော်၌ စတင်လိုက်ပြီဖြစ်သည်။ မဲခေါင်-လန်ချန်းပူးပေါင်းဆောင်ရွက်မှု အထူးရန်ပုံငွေ (၂၀၂၅) ဖြင့် ဆောင်ရွက်သည့် အဆိုပါစီမံကိန်းသည် ဒေသနွား၊ သိုး၊ ဆိတ် စသည့် စားမြုံ့ပြန်သတ္တဝါများအတွက် အစာကြမ်းရှားပါးချိန်တွင် ကုန်ကျစရိတ်သက်သာပြီး အာဟာရပြည့်ဝသော အစာများ ရရှိစေရန် ရည်ရွယ်ခြင်းဖြစ်သည်။ ပြည်ထောင်စုဝန်ကြီး ဦးမင်းနောင်က ဇန်နဝါရီ ၂၂ ရက်တွင် ကျင်းပသည့် အလုပ်ရုံဆွေးနွေးပွဲ၌ စိုက်ပျိုးရေးနှင့် မွေးမြူရေးကဏ္ဍ ဆက်နွယ်မှုကို အားကောင်းစေခြင်းဖြင့် ကျေးလက်တောင်သူများ၏ ဝင်ငွေတိုးပွားလာမည်ဖြစ်ကြောင်း ပြောကြားခဲ့သည်။ ဤစီမံကိန်းကို နေပြည်တော်၊ ဇေယျာသီရိမြို့နယ်အတွင်းရှိ ကြိုပင်ရွာ၊ သပြေပင်ရွာနှင့် ရှားစီးဖိုကျေးရွာများတွင် အကောင်အထည်ဖော်မည်ဖြစ်ပြီး၊ တောင်သူများအား ဘေးထွက်ပစ္စည်းများကို အရည်အသွေးကောင်းမွန်သော အစာကြမ်းအဖြစ် ပြုပြင်နည်းနှင့် ဖြည့်စွက်စာ ပြုလုပ်နည်းပညာများကို လက်တွေ့သင်ကြား ဖြန့်ဝေပေးသွားမည်ဖြစ်ကြောင်း သိရှိရပါသည်။