နေပြည်တော်တွင် စိုက်ပျိုးရေးဘေးထွက်ပစ္စည်းများကို အာဟာရပြည့်ဝသည့် အစာအဖြစ် ပြုပြင်ကျွေးမွေး၍ တစ်နိုင်တစ်ပိုင် မွေးမြူထုတ်လုပ်ရေးမြှင့်တင်ခြင်းစီမံကိန်းမိတ်ဆက်အလုပ်ရုံဆွေးနွေးပွဲနှင့် နည်းပညာဆိုင်ရာ သင်တန်းဖွင့်လှစ်ခဲ့

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန မွေးမြူရေးသုတေသနဦးစီးဌာနက မဲခေါင်-လန်ချန်းပူးပေါင်းဆောင်ရွက်မှု အထူးရန်ပုံငွေ (၂၀၂၅) ဖြင့် ဆောင်ရွက်သည့် ပြည်ထောင်စုနယ်မြေ နေပြည်တော်အတွင်း မွေးမြူရေးတောင်သူအခြေပြု စိုက်ပျိုးရေးဘေးထွက်ပစ္စည်းများကို စားမြုံ့ပြန် သတ္တဝါ (ဒေသနွား၊ သိုး၊ ဆိတ်) များအတွက် အာဟာရပြည့်ဝသည့်အစာအဖြစ် ပြုပြင်ကျွေးမွေး၍ တစ်နိုင်တစ်ပိုင် မွေးမြူထုတ်လုပ်ရေးကို မြှင့်တင်ခြင်းစီမံကိန်းမိတ်ဆက် အလုပ်ရုံဆွေးနွေးပွဲနှင့် နည်းပညာဆိုင်ရာ သင်တန်းဖွင့်ပွဲကို ယနေ့နံနက်ပိုင်းက မင်္ဂလာသီရိဟိုတယ် Grand Ballroom ၌ ကျင်းပသည်။ယခုစီမံကိန်းကို ပြည်ထောင်စုနယ်မြေ နေပြည်တော်ရှိ ဇေယျာသီရိမြို့နယ်၊ သစ်တပ်ကျေးရွာအုပ်စု ကြိုပင်ရွာ၊ သပြေပင်ရွာနှင့် ရှားစီးဖိုကျေးရွာများတွင် အကောင်အထည်ဖော် ဆောင်ရွက်သွားမည်ဖြစ်ပြီး မွေးမြူသူတောင်သူများအတွက် မိမိတို့ပတ်ဝန်းကျင်မှရရှိသော စိုက်ပျိုးရေးဘေးထွက် ပစ္စည်းများကို အရည်အသွေးကောင်းမွန်သော အစာကြမ်းအဖြစ် ပြုပြင်နည်းများ၊ ဖြည့်စွက်စာပြုလုပ် ကျွေးမွေးနည်းပညာများကို မွေးမြူရေးတောင်သူများသို့ ဖြန့်ဝေပေးပြီး လက်တွေ့လုပ်ဆောင်ကျွေးမွေးစေကာ မွေးမြူရေးကဏ္ဍတိုးတက်ရေးအတွက် စားမြုံ့ပြန်သတ္တဝါမွေးမြူရေးတွင် အဓိကကျသော အရည်အသွေးကောင်းမွန်သည့် အစာကြမ်းရရှိအောင် ပြုပြင်နည်းလမ်းများကို ဖြန့်ဝေသွားမည်ဖြစ်ကြောင်း သိရသည်။