ထိုင်းနိုင်ငံ အလယ်ပိုင်း၊ အယုဒ္ဓယခရိုင်မှာ မြန်မာရွှေ့ပြောင်းလုပ်သားတွေ ဆူညံပြီး ပတ်ဝန်းကျင်ကို အနှောင့်အယှက်ပြုတာကြောင့်ဆိုပြီး ထိုင်းမျိုးချစ်ဝါဒီအဖွဲ့က သွားရောက်အင်အားပြ ရိုက်နှက် ခြိမ်းခြောက် သတိပေးခဲ့ပြီးနောက် မြန်မာနိုင်ငံသားတွေ စိုးရိမ်နေပါတယ်။ အယုဒ္ဓယခရိုင်၊ ဘန်ပအင်မြို့၊ ဆင်ထိဝါးရပ်ကွက်ထဲမှာ မြန်မာလုပ်သားတွေ ဝင်ရောက်နေထိုင်ပြီး ညအချိန်မတော် ဆူညံသံပြုတာ၊ အရင်ဝိုင်းဖွဲ့သောက်စား စကားများငြင်းခုံတာ၊ ယာဉ်စည်းကမ်း လမ်းစည်းကမ်းမလိုက်နာတာ၊ ယဉ်ကျေးမှူမရှိတာ စတာတွေကြောင့် ပတ်ဝန်းကျင်အနှောင့် အယှက်ဖြစ်ရကြောင်း “တေ့အာချီဝ ” (အရပ်အခေါ် နှုတ်ခမ်းမွေး) ဆိုသူ ဦးဆောင်တဲ့အဖွဲ့ဟာ ဇန်နဝါရီ ၁၉ ရက် ည ၉ နာရီလောက်က အဆိုပါရပ်ကွက်ထဲရောက်လာကာ အနီးနားရပ်ကွက်နေ ပြည်သူ ၁၀၀ ကျော်လောက်ကလည်း အဲဒီနားကို ဝိုင်းရံရောက်ရှိလာပြီးတော့ မြန်မာလုပ်သားတွေရဲ့ လုပ်ရပ်တွေကို တယောက်တပေါက် တိုင်တောကြတယ်လို့ ထိုင်းသတင်းတွေမှာ ဖော်ပြပါတယ်။
