ထိုင်းနိုင်ငံ ရထားလမ်းဆောက်လုပ်ရေး ကရိန်းပြိုကျမှုတွင် သေဆုံးသူများအတွက် တစ်ဦးလျှင် လျော်ကြေးငွေ ဘတ် ၁.၆၉ သန်းစီ ပေးအပ်မည်

ထိုင်းနိုင်ငံ၊ Nakhon Ratchasima ပြည်နယ်၌ ဇန်နဝါရီ ၁၄ ရက်က ဖြစ်ပွားခဲ့သော ရထားလမ်းစီမံကိန်း ကရိန်းပြိုကျမှုကြောင့် သေဆုံးခဲ့ရသူများ၏ မိသားစုဝင်များအား တစ်ဦးလျှင် လျော်ကြေးငွေ ဘတ် ၁.၆၉ သန်းစီ ကနဦးပေးအပ်ရန် အတည်ပြုလိုက်ကြောင်း ပြည်နယ်အုပ်ချုပ်ရေးမှူးက ဇန်နဝါရီ ၁၆ ရက်တွင် ပြောကြားခဲ့သည်။ အဆိုပါလျော်ကြေးငွေတွင် ထိုင်းနိုင်ငံမီးရထား (SRT) မှ ဘတ် ၁ သန်း၊ အာမခံမှ ၃၄၀,၀၀၀၊ တရားဥပဒေအရ လျော်ကြေး ၂၀၀,၀၀၀ နှင့် ကန်ထရိုက်တာ ITD ကုမ္ပဏီမှ ၁၅၀,၀၀၀ တို့ ပါဝင်ပြီး ဒဏ်ရာရရှိသူများကိုလည်း တစ်ဦးလျှင် ဘတ် ၅၀,၀၀၀ စီ ကနဦးပေးအပ်သွားမည်ဖြစ်သည်။ ဝန်ကြီးချုပ်ဦးဆောင်သည့် အရေးပေါ်အစည်းအဝေးတွင် ဆောက်လုပ်ရေးဘေးကင်းလုံခြုံမှု စံနှုန်းများကို ပြန်လည်သုံးသပ်ရန်နှင့် တာဝန်ရှိသည့် ကန်ထရိုက်တာများကို ဥပဒေအရ အရေးယူရန် ဆွေးနွေးခဲ့ကြကြောင်း သိရှိရပါသည်။