နိုဘယ်လ်ဆုတံဆိပ် သို့မဟုတ် မှတ်တမ်းလွှာသည် နောင်တစ်ချိန်တွင် အခြားသူတစ်ဦးထံသို့ ရောက်ရှိသွားစေကာမူ၊ ၎င်းသည် နိုဘယ်လ်ငြိမ်းချမ်းရေးဆုကို မည်သူက ရရှိခဲ့သည်ဆိုသည့် အချက်ကို ပြောင်းလဲနိုင်ခြင်း မရှိဟု နိုဘယ်လ်ငြိမ်းချမ်းရေးဆုကော်မတီက ဇန်နဝါရီလ၁၆ ရက်နေ့စွဲဖြင့် ကြေညာချက်တစ်ခုကို ထုတ်ပြန်လိုက်သည်။ဗင်နီဇွဲလား အတိုက်အခံခေါင်းဆောင် မာရီယာ ကိုရီနာ မာချာဒိုက အိမ်ဖြူတော်တွင် ပြုလုပ်သည့် တွေ့ဆုံပွဲ၌ သူမ၏ နိုဘယ်လ်ငြိမ်းချမ်းရေးဆု တံဆိပ်ကို သမ္မတ ဒေါ်နယ်ထရမ့်ထံ ပေးအပ်ခြင်းအား ထရမ့်က လက်ခံခဲ့ပြီးနောက် ယခုကြေညာချက် ထွက်ပေါ်လာခြင်းဖြစ်သည်။နိုဘယ်လ်ငြိမ်းချမ်းရေးဆုကော်မတီ၏ ထုတ်ပြန်ချက်မှာ အောက်ပါအတိုင်းဖြစ်သည်"နိုဘယ်လ်ဆုနှင့် ဆုရှင်သည် ခွဲခြား၍မရနိုင်သော အရာများဖြစ်သည်နိုဘယ်လ်ဆုတံဆိပ်နှင့် ဂုဏ်ပြုမှတ်တမ်းလွှာတို့သည် လူပုဂ္ဂိုလ်တစ်ဦး သို့မဟုတ် အဖွဲ့အစည်းတစ်ခုအား နိုဘယ်လ်ငြိမ်းချမ်းရေးဆု ချီးမြှင့်ခြင်းကို အတည်ပြုသည့် ရုပ်ပိုင်းဆိုင်ရာ အထိမ်းအမှတ်များ ဖြစ်ကြသည်။ ဆုကိုယ်နှိုက် (ဆိုလိုသည်မှာ ဂုဏ်ပြုမှုနှင့် အသိအမှတ်ပြုမှု) သည် နော်ဝေနိုဘယ်လ်ကော်မတီမှ ရွေးချယ်သတ်မှတ်ထားသော ဆုရှင် (ပုဂ္ဂိုလ် သို့မဟုတ် အဖွဲ့အစည်း) နှင့်သာ အမြဲတမ်း ခွဲခြား၍မရအောင် ဆက်စပ်နေမည် ဖြစ်သည်။"နိုဘယ်လ်ငြိမ်းချမ်းရေးဆုရှင် တစ်ဦးသည် ဆု၏ အဓိကသင်္ကေတ နှစ်ခုဖြစ်သော ရွှေတံဆိပ်နှင့် ဂုဏ်ပြုမှတ်တမ်းလွှာတို့ကို လက်ခံရရှိသည်။ ထို့အပြင် ဆုကြေးငွေကိုလည်း သီးခြားစီ ချီးမြှင့်သည်။ ဆုတံဆိပ်၊ မှတ်တမ်းလွှာ သို့မဟုတ် ဆုကြေးငွေတို့အပေါ် မည်သို့ပင် ဖြစ်ပျက်ပါစေ၊ သမိုင်းတွင် ဆုလက်ခံရရှိသူအဖြစ် မှတ်တမ်းတင်ကျန်ရစ်မည့်သူမှာ မူလဆုရှင်သာလျှင် ဖြစ်သည်။ ဆုတံဆိပ် သို့မဟုတ် မှတ်တမ်းလွှာသည် နောင်တစ်ချိန်တွင် အခြားသူတစ်ဦးထံသို့ ရောက်ရှိသွားစေကာမူ၊ ၎င်းသည် နိုဘယ်လ်ငြိမ်းချမ်းရေးဆုကို မည်သူက ရရှိခဲ့သည်ဆိုသည့် အချက်ကို ပြောင်းလဲနိုင်ခြင်း မရှိပေ။""ဆုရှင်တစ်ဦးအနေဖြင့် မိမိရရှိသောဆုကို အခြားသူများနှင့် ဝေမျှခြင်း သို့မဟုတ် ဆုကြေညာပြီးနောက်ပိုင်းတွင် လွှဲပြောင်းပေးအပ်ခြင်းမျိုး ပြုလုပ်၍မရပါ။ ထို့အပြင် နိုဘယ်လ်ငြိမ်းချမ်းရေးဆုကို ပြန်လည်ရုပ်သိမ်းခြင်းလည်း လုံးဝ (လုံးဝ) မပြုလုပ်နိုင်ပါ။ ကော်မတီ၏ ဆုံးဖြတ်ချက်သည် အတည်ဖြစ်ပြီး ထာဝရသက်ရောက်မှု ရှိသည်။
"နော်ဝေနိုဘယ်လ်ကော်မတီသည် ငြိမ်းချမ်းရေးဆုရှင်များ သို့မဟုတ် ၎င်းတို့ပါဝင်ပတ်သက်နေသည့် နိုင်ငံရေးဖြစ်စဉ်များနှင့် ပတ်သက်၍ နေ့စဉ်နှင့်အမျှ မှတ်ချက်ပေးရန်မှာ ၎င်းတို့၏ တာဝန်မဟုတ်ဟု ရှုမြင်သည်။ ဆုကို ကော်မတီမှ ဆုံးဖြတ်ချက်ချမှတ်သည့် အချိန်အထိ ဆုရှင်၏ ကြိုးပမ်းအားထုတ်မှုများအပေါ် အခြေခံ၍ ချီးမြှင့်ခြင်းဖြစ်သည်။"ကော်မတီအနေဖြင့် ဆုရှင်များ၏ နောက်ပိုင်းတွင် ပြောကြားသော စကားများ၊ ချမှတ်သော ဆုံးဖြတ်ချက်များ သို့မဟုတ် လုပ်ဆောင်ချက်များအပေါ် မှတ်ချက်ပေးမည် မဟုတ်ပါ။ ဆုရှင်များ၏ လက်ရှိလုပ်ဆောင်နေသော ဆန်းစစ်မှုများ သို့မဟုတ် ရွေးချယ်မှုများသည် ၎င်းတို့၏ ကိုယ်ပိုင်တာဝန်သာ ဖြစ်ကြောင်း နားလည်ရမည်ဖြစ်သည်။"နိုဘယ်လ်ဖောင်ဒေးရှင်း၏ ဥပဒေစည်းမျဉ်းများတွင် ဆုရှင်တစ်ဦးအနေဖြင့် ဆုတံဆိပ်၊ မှတ်တမ်းလွှာ သို့မဟုတ် ဆုကြေးငွေတို့အား မည်သို့လုပ်ဆောင်ရမည်ဟူသော ကန့်သတ်ချက်များ မရှိပါ။ ဆိုလိုသည်မှာ ဆုရှင်တစ်ဦးသည် ဤအရာပစ္စည်းများကို မိမိဘာသာ သိမ်းဆည်းထားခြင်း၊ လက်ဆောင်ပေးခြင်း၊ ရောင်းချခြင်း သို့မဟုတ် လှူဒါန်းခြင်းတို့ကို လွတ်လပ်စွာ ပြုလုပ်ပိုင်ခွင့်ရှိသည်။"
