ထိုင်းနိုင်ငံတွင် ရထားပေါ် ကရိန်းပြိုကျမှုကြောင့် လက်ထပ်ပြီးတစ်ရက်သာရှိသေးသည့် ထိုင်း-ကိုရီးယား ဇနီးမောင်နှံ သေဆုံး

ထိုင်းနိုင်ငံ၊ Nakhon Ratchasima ပြည်နယ်တွင် ဇန်နဝါရီ ၁၄ ရက်က ခုတ်မောင်းနေသည့် အထူးအမြန်ရထားပေါ်သို့ ကရိန်းပြိုကျသည့် ဖြစ်စဉ်အတွင်း အသက် ၃၅ နှစ်အရွယ် ထိုင်းအမျိုးသမီး မနန်းကေယီနှင့် ၎င်း၏ခင်ပွန်း အသက် ၃၇ နှစ်အရွယ် တောင်ကိုရီးယားနိုင်ငံသား ကင်ယောင်ဟိုတို့ နှစ်ဦးစလုံး ကွယ်လွန်သွားခဲ့ကြသည်။ အဆိုပါစုံတွဲသည် ချစ်သူသက်တမ်း ၁၀ နှစ်ကျော်အကြာတွင် ထိုင်းနိုင်ငံသို့ ပြန်လာကာ ဇန်နဝါရီ ၁၃ ရက်ကမှ လက်ထပ်စာချုပ်တွင် လက်မှတ်ရေးထိုးခဲ့ကြခြင်းဖြစ်ပြီး၊ လက်ထပ်ပြီး တစ်ရက်အကြာ နေအိမ်သို့အပြန်လမ်းတွင် ယခုကဲ့သို့ ကြေကွဲဖွယ်ရာ ကြုံတွေ့ခဲ့ရခြင်းဖြစ်သည်။ ကွယ်လွန်သူ အမျိုးသမီးတွင် ကျန်ရစ်ခဲ့သည့် ကလေးငယ်နှစ်ဦးရှိပြီး ၎င်း၏မိခင်ဖြစ်သူက ဆက်လက်စောင့်ရှောက်သွားမည်ဟု ဆိုသည်။ ၎င်းတို့ဇနီးမောင်နှံ၏ လူမှုကွန်ရက်ပေါ်တွင် တင်ခဲ့သည့် "Successfully completed" (အောင်မြင်စွာပြီးမြောက်ခဲ့ပြီ) ဆိုသော လက်ထပ်စာချုပ်ချုပ်ဆိုသည့် ပုံရိပ်မှာလည်း နောက်ဆုံးနှုတ်ဆက်ခြင်း ဖြစ်သွားခဲ့ရပါသည်။