ထုတ်လုပ်အစီးရေအရ ဥရောပတွင် ဒုတိယအကြီးဆုံး ကားလုပ်ငန်းစုဖြစ်သည့် Stellantis ကျောထောက်နောက်ခံ ပြုထားသည့် တရုတ်ကားကုမ္ပဏီ Leapmotor သည် ယခုနှစ် ၂၀၂၅ နှစ်ကုန်ပိုင်းတွင် မလေးရှားမှာ ကားများ ထုတ်လုပ်ရန် စီစဉ်နေသည်။ မလေးရှားတွင် တည်ရှိသည့် Stellantis ၏ ကားစက်ရုံကို အသုံးပြုပြီး ကားများ ထုတ်လုပ်မည်။ ထို့အတွက် ကနဦးအနေဖြင့် ယူရို ၅ သန်း (ကန်ဒေါ်လာ ၅.၇ သန်း) ရင်းနှီးမြှုပ်နှံမည်။ Leapmotor ၏ C10 SUV မော်ဒယ်ကို ထုတ်လုပ်မည်။ C10 မော်ဒယ်ကို တရုတ်ပြည်မှာ ၂၀၂၄ မတ်လတွင် စတင်ရောင်းချခဲ့သည်။ ခရီးတာ တိုးချဲ့ လျှပ်စစ်ကား extended-range electric vehicle (EREV) ဗားရှင်းနှင့် လျှပ်စစ်ကားစစ်စစ် battery electric vehicle (BEV) ဗားရှင်းတို့ ထုတ်လုပ်သည်။ ၅ ယောက်စီး SUV ဖြစ်ပြီး တရုတ်ပြည်တွင် လက်ရှိရောင်းဈေးမှာ ယွမ် ၁၂၈,၈၀၀ ($17,640) ဖြစ်သည်။ ဥရောပ ၁၃ နိုင်ငံတွင် C10 ကို ၂၀၂၄ စက်တင်ဘာလတွင် စတင်ရောင်းချသည်။
