တရုတ်ပို့ကုန်များအပေါ် အနောက်နိုင်ငံများ၏ ပိတ်ဆို့ဒဏ်ခတ်မှုများကိုရှောင်ရန် အာဆီယံနိုင်ငံများသို့ တရုတ်ရင်းနှီးမြှုပ်နှံမှုများ ဝင်ရောက်လာမှု များပြားလာပြီး EV ကားစက်ရုံများ တည်ဆောက်လည်ပတ်နေသည်။ သို့သော် တရုတ်စက်ရုံများသည် ထိုနိုင်ငံများတွင် အလုပ်အကိုင်အခွင့်အလမ်းရရှိရန် အားပေးခြင်းမျိုးမဟုတ်ဘဲ ရှိရင်းစွဲ ဆက်စပ်စက်ရုံများပင် ပိတ်သိမ်းရသည်အထိ ဖြစ်လာနေသည်။ တရုတ်စက်ရုံများသည် သက်ဆိုင်ရာနိုင်ငံ၏ ပြည်တွင်းမှထုတ်လုပ်သော စက်ပစ္စည်းများမသုံးဘဲ လိုအပ်သည့် ပစ္စည်းများအားလုံးကို တရုတ်နိုင်ငံမှ တင်သွင်းလာခြင်းဖြစ်သည်။ ထို့ပြင် တရုတ် EV ကုမ္ပဏီများ အခြားနိုင်ငံများသို့ နည်းပညာလွှဲပြောင်းမပေးရန် တရုတ်အစိုးရက ဥပဒေဖြင့် ထိန်းချုပ်ထားသည်။ အလားတူ တရုတ်နိုင်ငံ၏ ဆောက်လုပ်ရေးနှင့် လျှပ်စစ်ပစ္စည်းများ အာဆီယံနိုင်ငံများသို့ ဝင်ရောက်လာခြင်းသည်လည်း ကြီးမားသည့် လျှပ်စစ်ယန္တရားပစ္စည်းများ (Electrical machinery) ထုတ်လုပ်နေသည့် ထိုင်းနှင့်မလေးရှားတို့ကို ခြိမ်းခြောက်နေသည်။
