မတ်လ ၂၆ ရက်နေ့ မနက်ပိုင်းက ရန်ကုန်မြို့ တာမွေမြို့နယ်မှာသတိမလည်တဲ့ စွန့်ပစ်ခံသက်ကြီးပိုင်းအမျိုးသားတစ်ဦးကို ဒေသခံလူမှုကူညီရေးအသင်းက သန်လျင်သဘာဝတရားရိပ်သာရှိ ကွန်းခိုရာဆေးရုံဆီ ပို့ဆောင်ပေးခဲ့ရတဲ့ ဖြစ်စဉ် ဖြစ်ပွားခဲ့တယ်လို့ သိရပါတယ်။အဆိုပါအဘိုးအိုကို တာမွေမြို့နယ်၊ တာမွေကြီး (က+ခ)ရပ်ကွက် အဝိုင်းထိပ် တံတားအောက်မှာ စွန့်ပစ်ထားတာဖြစ်ပြီး ဘယ်အချိန်က လာရောက်စွန့်ပစ်ခဲ့မှန်းမသိရှိရပေမယ့် အနီးအနားနေထိုင်သူတွေ တွေ့မြင်နေရတာ တစ်ပတ်ဝန်းကျင်ရှိပြီလို့ ဆိုပါတယ်။ ပြီးခဲ့တဲ့ နှစ်ရက် သုံးရက်ခန့်ကတော့ အစာမစားဘဲ နေထိုင်မကောင်းပုံပေါ်တာကြောင့် ပတ်ဝန်းကျင်ကပဲ သန့်ရှင်းရေးဆောင်ရွက်ပေးကာ ဆေးခန်းပြသကူညီပေးခဲ့ကြောင်းနဲ့ မနေ့က မတ်လ ၂၆ ရက် မနက်မှာတော့ အသက်ရှုနေပြီး သတိမလည်ခဲ့တာလည်းဖြစ်ပါတယ်။
