မကွေးတိုင်းဒေသကြီး၊ မင်းဘူး(စကု)မြို့နယ်ရှိ ရွှေစက်တော်တောရိုင်းတိရစ္ဆာန်ဘေးမဲ့တောဥယျာဉ်၌ ဌာနေဖွားဒေသရင်းမျိုးစိတ်ရှားပါးစာရင်းဝင် မြန်မာ့ရွှေသမင် ၆၂ ကောင်ကို ထိန်းသိမ်းစောင့်ရှောက်ထားကြောင်းသိရသည်။ ရွှေစက်တော်တောရိုင်းတိရစ္ဆာန်ဘေးမဲ့တောဥယျာဉ်သည် မြန်မာနိုင်ငံအလယ်ပိုင်းမင်းဘူး(စကု)မြို့နယ်၌ တည်ရှိပြီး ဧရိယာစတုရန်းမိုင် ၂၁၃.၄ မိုင်ကျယ်ဝန်းကာ အပူပိုင်းခြောက်သွေ့သောသန်းဒဟတ်တောများကိုလည်းကောင်း၊ မုန်းချောင်းနှင့်မန်းချောင်းရေဝေကုန်းတန်းများကိုလည်းကောင်းကာကွယ်ထိန်းသိမ်းစောင့်ရှောက်ရန် ၁၉၄၀ ပြည့်နှစ်တွင်စတင်တည်ထောင်ခဲ့သည်။ ၂၀၁၂ ခုနှစ်တွင် နေပြည်တော်ဆာဖာရီဥယျာဉ်နှင့်ပုဂံလောကနန္ဒာဥယျာဉ်များမှ ရွှေသမင်အထီးငါးကောင်၊အမခုနစ်ကောင်ဖြင့်မွေးမြူထိန်းသိမ်းခဲ့ခြင်းဖြစ်ပြီး ယခုအချိန်တွင် အထီး ၁၈ ကောင်၊ အမ ၃၅ ကောင် စုစုပေါင်းရွှေသမင် ၅၃ ကောင်ရှိကာ ယခုလက်ရှိ ရွှေသမင်သားကိုးကောင်ပေါက်ဖွားလာရာ စုစုပေါင်း ၆၂ ကောင်အား အစာရေစာများတိုက်ကျွေးသည့်အပြင် ဖြည့်စွက်စာများကိုပါ ဝယ်ယူကျွေးမွေး၍ အနီးကပ်ဂရုတစိုက်ထိန်းသိမ်းစောင့်ရှောက်ထားကြောင်းသိရသည်။ " ကြယ်လိပ်တို့၊ ရွှေသမင်တို့ဆိုတာ ကမ္ဘာ့ရှားပါးမျိုးစိတ်စာရင်းဝင်တွေပါ။ မြန်မာတစ်နိုင်ငံတည်းမှာသာရှိတဲ့ဌာနေဖွားဒေသရင်းမျိုးစိတ်တွေဖြစ်ပြီး အလွန်မတန်မှရှားပါးတဲ့အတွက် မျိုးသုဉ်းမျိုးဆက်မပြတ်စေရေး၊ ရွှေသမင်သားပေါက်တွေတိုးပွားလာစေရေးအတွက် ဂရုတစိုက်ထိန်းသိမ်းစောင့်ရှောက်ထားရပါတယ်။
