ရန်ကုန်တိုင်းဒေသကြီးအတွင်းရှိ မြို့နယ်အချို့၌ ညဉ့်နက်ပိုင်း လူခြေတိတ်ချိန်တွင် စက်ဘီး၊ ဆိုင်ကယ်နှင့် မော်တော်ယာဉ် အပိုပစ္စည်းများကို လိုက်လံခိုးယူသည့် ဖြစ်စဉ်များ ပြန်လည်များပြားလာနေသည်။
ခိုးယူမှုများသည် ည ၁၂ နာရီမှ နံနက် ၄ နာရီဝန်းကျင်အတွင်း အဓိကဖြစ်ပွားလေ့ရှိပြီး ကားမှန်များ၊ ဘီးအဖုံးများ၊ နောက်ကြည့်မှန်များနှင့် ကားအောက်ပိုင်း အပိုပစ္စည်းများကို စနစ်တကျ ဖြုတ်ယူလေ့ရှိကြသည်။ ခိုးယူသူများသည် ဆိုင်ကယ်များဖြင့် အုပ်စုဖွဲ့ ကင်းလှည့်ကာ CCTV များ၊ လမ်းမီးနည်းသည့် လမ်းကြားများနှင့် တိုက်ခန်းရှေ့များကို ပစ်မှတ်ထား၍ အကွက်ချ လုပ်ဆောင်ကြသည်။ ထို့အပြင် ဓားနှင့် လက်နက်ငယ်များကိုပါ ဆောင်ထားလေ့ရှိသဖြင့် လမ်းကြုံတွေ့ရှိသူများပင် ဝင်ရောက်မတားဆီးရဲသည့် အခြေအနေဖြစ်နေသည်။စီးပွားရေး ကျပ်တည်းမှုနှင့်အတူ ခိုးရာပါ ပစ္စည်းများကို လမ်းဘေးဆိုင်အချို့နှင့် အွန်လိုင်းအရောင်းအဝယ် Group များမှတစ်ဆင့် လွယ်ကူစွာ ပြန်လည်ရောင်းချနိုင်သည့် ဈေးကွက်များ ရှိနေခြင်းကလည်း ခိုးမှုများပြားလာရသည့် အဓိကအကြောင်းရင်းတစ်ခု ဖြစ်သည်။လက်ရှိတွင် ပြည်သူများအနေဖြင့် မိမိတို့၏ စက်ဘီး၊ ဆိုင်ကယ်နှင့် ကားများကို ခြံဝင်းအတွင်း စနစ်တကျ ထည့်သွင်း သော့ခတ်ထားရန် သတိပြုနေကြရပြီး အချက်ပေးစနစ်များ တပ်ဆင်ခြင်း၊ ရပ်ကွက်လိုက် ညကင်းစောင့်ခြင်းများ ပြုလုပ်နေကြရသည်။ သက်ဆိုင်ရာ တာဝန်ရှိသူများဘက်မှလည်း လုံခြုံရေး ကင်းလှည့်မှုများ တိုးမြှင့်ပေးရန်နှင့် ခိုးရာပါပစ္စည်း လက်ခံသည့် ဆိုင်များကို ထိရောက်စွာ အရေးယူပေးရန် ဒေသခံများက လိုလားလျက်ရှိသည်။
