ရန်ကုန်တိုင်းဒေသကြီးရှိကမ္ဘောဇရိပ်သာ (ချင်းချောင်းနန်းတော်) နှင့် ဗိုလ်ချုပ်အောင်ဆန်းပြတိုက်တို့တွင် ရှေးဟောင်းအဆောက်အအုံ ကြေးပြားကမ္ပည်းမော်ကွန်း တပ်ဆင်

ရန်ကုန်တိုင်းဒေသကြီးအတွင်းရှိ ကမ္ဘောဇရိပ်သာ (ချင်းချောင်းနန်းတော်) နှင့် ဗိုလ်ချုပ်အောင်ဆန်းပြတိုက်တို့တွင် ရှေးဟောင်းအဆောက်အအုံ ကြေးပြားကမ္ပည်းမော်ကွန်း တပ်ဆင်ခြင်း အခမ်းအနားကို ဇူလိုင် ၂၈ ရက်က ကျင်းပခဲ့သည်။ အဆိုပါ အဆောက်အအုံ နှစ်ခုအပါအဝင် ရန်ကုန်တိုင်းအတွင်း ကြေးပြားကမ္ပည်းမော်ကွန်း တပ်ဆင်ပြီးသည့် ရှေးဟောင်းအဆောက်အအုံ စုစုပေါင်း ၆ ခု ရှိလာပြီဖြစ်ကြောင်း ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်က ပြောကြားခဲ့သည်။ လက်ရှိတွင် တစ်နိုင်ငံလုံး၌ ယဉ်ကျေးမှု၊ သမိုင်း၊ ဗိသုကာနှင့် အနုပညာလက်ရာ တန်ဖိုးမြင့်မားသည့် သက်တမ်း နှစ် (၁၀၀) နှင့်အထက် ရှေးဟောင်းအဆောက်အအုံ စုစုပေါင်း ၆,၁၀၅ လုံးအထိ ဥပဒေအရ သတ်မှတ်ထိန်းသိမ်းထားကြောင်း သိရသည်။