ရန်ကုန်မြို့၌ လျှပ်စစ်ဓာတ်အားပြတ်တောက်၍ ရေပေးဝေစဉ် ရေအားနည်းမှုဖြစ်ပေါ်ခဲ့သည့်အတွက် ရန်ကုန်စည်ပင် တောင်းပန်

ရန်ကုန်မြို့တွင်း မြို့နယ်အချို့သို့ ရေဖြန့်ဖြူးပေးနေသည့် လှော်ကားရေလှောင်ကန်၊ ငမိုးရိပ်ရေသန့်စင်စက်ရုံ (ညောင်နှစ်ပင်) နှင့် ဒလမြို့နယ်သို့ ရေပေးဝေသည့် ရန်ကုန်ပေါက် ရေပေးဝေရေးစခန်းတို့တွင် ဇူလိုင် ၂၆ ရက်က လျှပ်စစ်ဓာတ်အား ယာယီပြတ်တောက်ခဲ့သဖြင့် ရေဖြန့်ဖြူးချိန်အတွင်း ရေအားနည်းမှုများ ဖြစ်ပေါ်ခဲ့သည်။ အဆိုပါ ဖြစ်စဉ်နှင့် ပတ်သက်၍ အခက်အခဲဖြစ်ခဲ့ရသည့် သုံးစွဲသူ ပြည်သူများကို ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန (ရေနှင့်သန့်ရှင်းမှု) က ယနေ့ (ဇူလိုင် ၂၇ ရက်) တွင် ပြန်လည်တောင်းပန် ထုတ်ပြန်ခဲ့ပြီး ရေသုံးစွဲရန် အခက်အခဲရှိပါက သက်ဆိုင်ရာဌာနများသို့ ဆက်သွယ်နိုင်ကြောင်း အသိပေးထားသည်။