ဝင်ငွေ နည်းပါးသော်လည်း ကုန်ဈေးနှုန်း မြင့်တက်နေဆဲ ဖြစ်၍ အခြေခံပြည်သူများ အခက်ကြုံ

တောင်ကြီးမြို့ အပါအဝင် ရှမ်းပြည်နယ်တောင်ပိုင်း၌ ပြည်သူများ၏ ဝင်ငွေ နည်းပါးနေသော်လည်း အခြေခံစားသောက်ကုန် ဈေးနှုန်းများမှာ ပြီးခဲ့သည့် မတ်လနှင့် နှိုင်းယှဉ်ပါက (ကြက်သွန်နှင့် အာလူးမှလွဲ၍) ဆက်လက်မြင့်တက်နေသဖြင့် အခြေခံလူတန်းစား ပြည်သူများ စားဝတ်နေရေး အခက်အခဲနှင့် ရင်ဆိုင်ကြုံတွေ့နေရသည်။ စက်သုံးဆီ ဈေးကြီးမြင့်မှု၊ ဝယ်ယူရခက်ခဲမှုတို့နှင့်အတူ ကုန်စည်ဈေးနှုန်းများ မြင့်တက်နေသဖြင့် တစ်နေ့လျှင် သောင်းဂဏန်းဝန်းကျင်နှင့် လစာ ကျပ် ၂ သိန်းခွဲခန့်သာ ရရှိသော အခြေခံလုပ်သားများမှာ ထမင်းနပ်မှန်အောင် စားသောက်နိုင်ရန် တော်တော်မက ရုန်းကန်နေရကြောင်း သိရသည်။