ရန်ကုန်မြို့နယ် ၁၆ မြို့နယ်တွင် ရေပြတ်တောက်မည်ဖြစ်၍ ရေကြိုတင်စုဆောင်းကြရန် အသိပေး

လှော်ကားရေတွန်းစက်ရုံမှ Transformer စက်ပိုင်းဆိုင်ရာ ချို့ယွင်းမှုကြောင့် ပြုပြင်ထိန်းသိမ်းခြင်း လုပ်ငန်းများ ဆောင်ရွက်မည်ဖြစ်၍ လာမည့် ဇူလိုင် ၂၇ ရက် မွန်းတည့် ၁ နာရီမှ ညနေ ၃ နာရီအထိ ရေပေးဝေရေး ခေတ္တရပ်နားမည်ဖြစ်ကြောင်း ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန (ရေနှင့်သန့်ရှင်းမှု) က အသိပေးထုတ်ပြန်ထားသည်။ ယင်းအစီအစဉ်ကြောင့် ပုဇွန်တောင်၊ ဗိုလ်တထောင်၊ ဗဟန်း၊ ပန်းဘဲတန်း၊ ကျောက်တံတား၊ လမ်းမတော်၊ လသာ၊ တာမွေ၊ မင်္ဂလာတောင်ညွန့်၊ မင်္ဂလာဒုံ၊ ရွှေပြည်သာ၊ မရမ်းကုန်း၊ လှိုင်၊ လှိုင်သာယာ (စက်မှုဇုန်)၊ အင်းစိန်နှင့် ကမာရွတ် အပါအဝင် မြို့နယ် ၁၆ မြို့နယ်၌ ရေပြတ်တောက်ခြင်းနှင့် ရေအားနည်းခြင်းများ ဖြစ်ပေါ်နိုင်သဖြင့် မိဘပြည်သူများ ရေကြိုတင် စုဆောင်းထားကြရန် နှိုးဆော်ထားသည်။