တောင်ကိုရီးယားနိုင်ငံ၊ဆိုးလ်မြို့ရှိ ဟန်မြစ်အနား၌ အများပြည်သူသုံး ရေကူးကန်များကို ညပိုင်းပါ ဖွင့်လှစ်ပေးလိုက်သဖြင့် လာရောက်သူ အလွန်များပြားနေ

တောင်ကိုရီးယားနိုင်ငံ ဆိုးလ်မြို့တော်အစိုးရသည် ပြင်းထန်သော နွေရာသီအပူလှိုင်းနှင့် အပူရှိန်ကြောင့် ညဘက်တွင်ပါ အပူဒဏ်ရှောင်နိုင်ရန်အတွက် ဟန်မြစ်ကမ်းနားရှိ အဓိကအများပြည်သူသုံး ရေကူးကန်များနှင့် ရေကစားကွင်းများ၏ ဖွင့်လှစ်ချိန်ကို ည ၁၀ နာရီအထိ တိုးမြှင့်ပေးလိုက်သည်။ အဆိုပါ ညပိုင်းတိုးမြှင့်ဖွင့်လှစ်မှုကို တွတ်ဆွန် (Ttukseom) နှင့် ယီအိုအီဒို (Yeouido) ရေကူးကန်များအပြင် ဂျမ်ဆီလ် (Jamsil) နှင့် နန်ဂျီ (Nanji) ရေကစားကွင်းများ၌ ဇူလိုင် ၃ ရက်နေ့မှစတင်ကာ ဩဂုတ် ၃၀ ရက်နေ့အထိ ပိတ်ရက်မရှိ ညစဉ် ညနေ ၆ နာရီမှ ၁၀ နာရီအထိ လုပ်ဆောင်ပေးနေခြင်း ဖြစ်သည်။ ယခုအခါ နေ့ခင်းဘက်တွင် လာရောက်သူများအပြင် အလုပ်ဆင်းချိန်၌ အပူဒဏ်ရှောင်ရန် လာရောက်သည့် ဝန်ထမ်းများပါ ပေါင်းစည်းကာ အထူးစည်ကားလျက်ရှိသည်။မြို့တော်အစိုးရ၏ စာရင်းဇယားများအရ ဇွန်လ ၁၉ ရက်နေ့ စတင်ဖွင့်လှစ်ချိန်မှစ၍ လက်ရှိအချိန်အထိ ဟန်မြစ်ရေကူးကန်များသို့ လာရောက်သူဦးရေသည် ၁၄၉,၉၈၈ ဦးအထိ ရှိလာခဲ့သည်။ ၎င်းတို့အနက် တွတ်ဆွန်ရေကူးကန်သို့ လာရောက်သူ ၅၀,၈၁၉ ဦးရှိခဲ့ပြီး ယခင်နှစ်ထက် ၂၉ ရာခိုင်နှုန်း မြင့်တက်လာကာ ယီအိုအီဒို ရေကူးကန်သို့ လာရောက်သူ ၄၉,၀၄၈ ဦးရှိခဲ့ပြီး ၃၇ ရာခိုင်နှုန်းအထိ သိသိသာသာ မြင့်တက်လာခဲ့သည်။ ရေကူးကန်များ၏ အဝင်ကြေးမှာ လူကြီးတစ်ဦးလျှင် ဝမ် ၅,၀၀၀ ခန့်သာ ကျသင့်သဖြင့် အကုန်အကျသက်သာပြီး အပန်းဖြေနိုင်မည့် နေရာသစ်တစ်ခု ဖြစ်လာသည်။ ထို့အပြင် မြို့တော်အစိုးရသည် လာရောက်သူများ ဘေးကင်းစိတ်ချရစေရန်အတွက် အချိန်နှင့်တပြေးညီ စောင့်ကြည့်နိုင်မည့် CCTV ကင်မရာ ၁၃၆ လုံးကို တပ်ဆင်ထားပြီး ရေအရည်အသွေးကိုလည်း နေ့စဉ် စနစ်တကျ စစ်ဆေးလျက်ရှိသည်။