ရှမ်းပြည်နယ် (အရှေ့ပိုင်း)၊ ကျိုင်းတုံမြို့တွင် ဆိုင်ကယ်များ မကြာခဏ ခိုးယူခံနေရပြီး ပြီးခဲ့သည့် ဇူလိုင်လ ၁၈ ရက် ညနေ ၄ နာရီခွဲခန့်ကလည်း ရပ်ကွက် (၁)၊ ကျိုင်းခွန်လမ်းရှိ ဆံပင်ညှပ်ဆိုင်ဖွင့်ထားသည့် နေအိမ်အောက်ထပ်မှ ဆိုင်ကယ်တစ်စီး ထပ်မံခိုးယူခံခဲ့ရကြောင်း သိရသည်။ ခိုးယူခံရသည့်ဆိုင်ကယ်မှာ ၂၀၁၈ ခုနှစ်ထုတ် Wave 110 အမျိုးအစား လိမ္မော်ရောင်ဆိုင်ကယ်ဖြစ်ပြီး အိမ်ရှင်အပေါ်ထပ်တွင် အိပ်ပျော်နေစဉ် အမည်မသိ အမျိုးသားနှစ်ဦးက အိမ်အတွင်း ဝင်ရောက်ကာ ဇက်သော့ခတ်ထားသည့်ကြားမှ ခိုးယူသွားခြင်းဖြစ်သည်။အိမ်ရှေ့ CCTV မှတ်တမ်းများအရ သူခိုးများသည် ဆိုင်ကယ်စီးဦးထုပ်များ ဆောင်းထားသဖြင့် ရုပ်နမူနာကို သေချာမသိရသော်လည်း အဆိုပါဆိုင်ကယ်ကို လာရောက်ပြင်ဆင်ခြင်း သို့မဟုတ် ရောင်းချခြင်းများရှိပါက အကြောင်းကြားပေးရန် ပိုင်ရှင်ဖြစ်သူက အကူအညီတောင်းခံထားပြီး ရဲစခန်းသို့ တိုင်ချက်ဖွင့်ရန် စီစဉ်နေသည်။ အဆိုပါ ကျိုင်းခွန်လမ်းတွင်ပင် ပြီးခဲ့သည့် ရက်ပိုင်းကလည်း ဆိုင်ကယ်နှစ်စီး ထပ်မံခိုးယူခံထားရဖူးကြောင်း ရပ်ကွက်နေပြည်သူများ၏ ပြောပြချက်အရ သိရသည်။
