အရှေ့အလယ်ပိုင်းပဋိပက္ခကြောင့် စက်သုံးဆီ၊ အာမခံနှင့် သင်္ဘောတင်ခများ မြင့်တက်လာမှုကြောင့် စင်ကာပူရှိ ကုန်စည်ပို့ဆောင်ရေးလုပ်ငန်း (Freight Forwarders) များ၏ အကျိုးအမြတ်မှာ ၂၀ ရာခိုင်နှုန်းခန့် ကျဆင်းသွားကြောင်း ၂၀၂၆ ခုနှစ်၊ မေလ ၁ ရက်နေ့တွင် CNA သတင်းကို ကိုးကား၍ Malay Mail က ဖော်ပြခဲ့ပါသည်။ အချို့သော လမ်းကြောင်းများတွင် ပို့ဆောင်ခမှာ နှစ်ဆခန့်အထိ မြင့်တက်သွားပြီး အန္တရာယ်ရှိသောဇုန်များကို ရှောင်ကွင်းမောင်းနှင်နေရသဖြင့် ပစ္စည်းရောက်ရှိမည့်ကြာချိန်မှာလည်း ပိုမိုကြာမြင့်လာခြင်းဖြစ်ပါသည်။
ဥပမာအားဖြင့် ယခင်က ဥရောပမှ စင်ကာပူသို့ ၂၁ ရက်ခန့်သာ ကြာမြင့်ခဲ့သော ပို့ဆောင်မှုများသည် ယခုအခါ အာဖရိကတောင်ဘက်စွန်း (Cape of Good Hope) ကို ပတ်၍ မောင်းနှင်နေရသဖြင့် ၄၅ ရက်မှ ၅၅ ရက်အထိ ကြာမြင့်နေပြီဖြစ်ပါသည်။ အရှေ့အလယ်ပိုင်းသို့ ပို့ဆောင်ခမှာ ၁၀ ဆခန့်အထိ မြင့်တက်သွားမှုများရှိနေပြီး ဒိုင်ဇယ်ဈေးနှုန်းများမှာလည်း သိသိသာသာ မြင့်တက်လာခဲ့ပါသည်။ ယင်းကြောင့် စင်ကာပူအခြေစိုက် Penanshin Air Express ကဲ့သို့သော ကုမ္ပဏီများသည် တိုးလာသော ကုန်ကျစရိတ်များကို ကာမိစေရန်အတွက် တစ်ကြိမ်ပို့ဆောင်လျှင် အပိုဆောင်းဝန်ဆောင်ခ (Surcharge) အဖြစ် စင်ကာပူဒေါ်လာ ၃၀ မှ ၅၀ ကြား ပုံသေစတင်ကောက်ခံနေပြီ ဖြစ်ကြောင်း သိရပါသည်။
