ဂျပန်တိုကျိုတက္ကသိုလ်၏လေ့လာမှုအရ ADHD ဝေဒနာလက္ခဏာများသည် နာတာရှည်နာကျင်ကိုက်ခဲမှု၏ ပြင်းထန်မှုနှင့် ဆက်စပ်နေကြောင်း သိရ

ဂျပန်တိုကျိုတက္ကသိုလ်မှ သုတေသီများကအာရုံစူးစိုက်မှုအားနည်းပြီး ဂနာမငြိမ်ဖြစ်သည့် ဝေဒနာ (ADHD) လက္ခဏာများသည် နာတာရှည်နာကျင်ကိုက်ခဲမှု (Chronic Pain) ပိုမိုပြင်းထန်လာခြင်းနှင့် တိုက်ရိုက်ဆက်စပ်နေကြောင်း ၂၀၂၆ ခုနှစ်၊ ဧပြီလ ၂၃ ရက်နေ့တွင် ထုတ်ပြန်သည့် တစ်နိုင်ငံလုံးအတိုင်းအတာ လေ့လာမှုသစ်တစ်ခုအရ သိရသည်။ ဂျပန်နိုင်ငံတစ်ဝှမ်းရှိ အထူးကုနာကျင်မှုဗဟိုဌာန (Pain Centers) များတွင် ကုသမှုခံယူနေသည့် လူနာ ၉၅၈ ဦးကို လေ့လာဆန်းစစ်ခဲ့ရာ ADHD လက္ခဏာရှိသူများသည် အဆိုပါလက္ခဏာမရှိသူများထက် ပိုမိုပြင်းထန်သော နာကျင်မှုကို ခံစားရနိုင်ခြေ ပိုများကြောင်း တွေ့ရှိရခြင်းဖြစ်သည်။ သိပ္ပံဂျာနယ် Scientific Reports တွင် ဖော်ပြထားသည့် အဆိုပါသုတေသနအရ ADHD နှင့် ဆက်စပ်နေသော စိတ်ပူပန်မှု၊ စိတ်ဓာတ်ကျမှုနှင့် အတွေးလွန်မှု (Negative Thinking) တို့သည် နာကျင်မှုကို ခံစားရသည့် အာရုံခံစားမှုအပေါ် သက်ရောက်မှုရှိနေကြောင်း တွေ့ရှိရသည်။ သုတေသနအဖွဲ့ခေါင်းဆောင် ဒေါက်တာ Satoshi Kasahara က နာတာရှည်နာကျင်ကိုက်ခဲမှု ခံစားနေရသော်လည်း အကြောင်းရင်းရှာမရသည့် လူနာများအတွက် ADHD ကဲ့သို့သော အာရုံကြောဖွံ့ဖြိုးမှုဆိုင်ရာ အခြေအနေများကိုပါ ထည့်သွင်းကုသပေးခြင်းဖြင့် နာကျင်မှုကို ပိုမိုထိရောက်စွာ သက်သာစေနိုင်ကြောင်း ထောက်ပြထားသည်။ ဤတွေ့ရှိချက်သည် နာတာရှည်နာကျင်မှုဝေဒနာရှင်များအတွက် ပိုမိုတိကျသော ကုသမှုပုံစံသစ်များ ဖော်ဆောင်နိုင်ရန် အထောက်အကူဖြစ်စေမည်ဖြစ်ကြောင်း သိရသည်။