လီဗာပူးလ်နောက်ခံလူ ရောဘတ်ဆန် ရာသီကုန်တွင် အသင်းမှထွက်ခွာမည်ဟု အတည်ပြု

လီဗာပူးလ်အသင်း၏ ဒုတိယအသင်းခေါင်းဆောင်နှင့် စကော့တလန်လက်ရွေးစင်အသင်းခေါင်းဆောင် အန်ဒီရောဘတ်ဆန်သည် ယခုဘောလုံးရာသီကုန်တွင် အသင်းမှထွက်ခွာတော့မည်ဖြစ်ကြောင်း လီဗာပူးလ်အသင်းက တရားဝင်ထုတ်ပြန်ကြေညာခဲ့သည်။ အသက် ၃၂ နှစ်အရွယ်ရှိ ရောဘတ်ဆန်သည် ၂၀၁၇ ခုနှစ်တွင် ဟားလ်စီးတီးအသင်းမှ ပြောင်းရွှေ့လာခဲ့သူဖြစ်ပြီး ၉ နှစ်တာကာလအတွင်း အသင်းအတွက် ပြိုင်ပွဲစုံ ၃၇၃ ပွဲကစားကာ ဂိုး ၁၃ ဂိုးသွင်းယူပေးခဲ့သည့်အပြင် ချန်ပီယံလိဂ်နှင့် ပရီးမီးယားလိဂ်ဖလား အပါအဝင် အောင်မြင်မှုများစွာ ရယူပေးခဲ့သည့် ဂန္ထဝင်ကစားသမားတစ်ဦးဖြစ်သည်။ယခုရာသီတွင် ကစားသမားသစ် ကာကက်ဇ် ရောက်ရှိလာမှုကြောင့် ပွဲထွက်ခွင့် ၁၅ ပွဲသာ ရရှိခဲ့သည့် ရောဘတ်ဆန်သည် ဇန်နဝါရီအပြောင်းအရွှေ့ကပင် စပါးအသင်းသို့ ပြောင်းရွှေ့ရန် နီးစပ်ခဲ့သော်လည်း အသင်း၏လိုအပ်ချက်ကြောင့် ရာသီကုန်အထိ ဆက်လက်နေထိုင်ခဲ့ခြင်းဖြစ်သည်။ ရောဘတ်ဆန်က လီဗာပူးလ်အသင်းသည် ၎င်း၏မိသားစုဘဝအတွက် အလွန်အရေးကြီးသော အစိတ်အပိုင်းတစ်ခုဖြစ်ပြီး လမ်းခွဲရန် ဆုံးဖြတ်ချက်မှာ ခက်ခဲခဲ့ကြောင်း ပြောကြားခဲ့သော်လည်း၊ အသင်းကမူ ၎င်းအား စစ်မှန်သော ဂန္ထဝင်တစ်ဦးအဖြစ် ဂုဏ်ပြုနှုတ်ဆက်သွားမည်ဖြစ်ကြောင်း သိရှိရပါသည်။