ဗီယက်နမ်နိုင်ငံ ဖူးကွက် (Phu Quoc) အထူးဇုန်ရှိ ကာစီနိုလုပ်ငန်းစု အမေရိကန်ဒေါ်လာ ၂၂၂ သန်းခန့် အရှုံးပေါ်နေ

ဗီယက်နမ်နိုင်ငံ၊ ဖူးကွက်ကျွန်းရှိ ပြည်တွင်းဖြစ် ကာစီနိုလုပ်ငန်းတစ်ခုဖြစ်သော Corona Resort & Casino ကို လုပ်ကိုင်နေသည့် Phu Quoc Tourism Development and Investment JSC ကုမ္ပဏီသည် ပြီးခဲ့သည့်နှစ်တွင် အခွန်ဆောင်ပြီးနောက် အရှုံးငွေ အမေရိကန်ဒေါ်လာ ၃၄.၈ သန်းခန့် ရှိခဲ့သဖြင့် ယခုအခါ စုစုပေါင်း အရှုံးငွေ (Accumulated Deficit) မှာ ဒေါ်လာ ၂၂၂ သန်း (ဗီယက်နမ်ဒေါင် ၅.၈ ထရီလီယံကျော်) အထိ ရှိလာကြောင်း ဧပြီလ ၇ ရက်နေ့ သတင်းများအရ သိရသည်။ အဆိုပါ ကာစီနိုသည် ဗီယက်နမ်နိုင်ငံသားများကို လောင်းကစားခွင့် ပြုထားသည့် ပထမဆုံး စမ်းသပ်စီမံကိန်းတစ်ခု ဖြစ်သော်လည်း ကိုဗစ်-၁၉ ကပ်ရောဂါအလွန်တွင် ပြည်တွင်းကစားသမား လျော့နည်းလာခြင်းနှင့် ကနဦးရင်းနှီးမြှုပ်နှံမှုအတွက် အတိုးပေးချေမှု မြင့်မားခြင်းတို့ကြောင့် ယခုကဲ့သို့ အရှုံးပေါ်နေခြင်းဖြစ်သည်။ လက်ရှိတွင် ကုမ္ပဏီအနေဖြင့် အရင်းအနှီးများ တိုးမြှင့်ခြင်းနှင့် လုပ်ငန်းများကို ပြန်လည်ဖွဲ့စည်းခြင်းများ ပြုလုပ်ကာ စီးပွားရေး ပြန်လည်ကောင်းမွန်လာစေရန် ကြိုးပမ်းလျက်ရှိသည်။