ထိုင်းတွင် ဆေးကြောင်ပြီး မိခင်ကို အခန်းပိတ်လှောင်၊ သေကြောင်းကြံအောင် ဖိအားပေးခဲ့သူ ဖမ်းမိ

ထိုင်းတွင် မိခင်ဖြစ်သူအား ဓားဖြင့်ခြိမ်းခြောက်ကာ နေအိမ်အတွင်း ပိတ်လှောင်ထားပြီး၊ မိခင်ဖြစ်သူမှာ စိတ်ဖိစီးလွန်း၍ ဆေးသောက်ကာ မိမိကိုယ်ကို အဆုံးစီရင်ရန် ကြိုးစားသည်ကိုပင် ကူညီခွင့်မပေးဘဲ ပိတ်ဆို့ထားခဲ့သည့် သားမိုက်တစ်ဦးကို ဆူရတ်ဌာနီ (Surat Thani) ဈေးတစ်ခုတွင် ရဲတပ်ဖွဲ့က ဖေဖော်ဝါရီလ ၄ ရက်နေ့က ဖမ်းဆီးရမိလိုက်ပြီ ဖြစ်သည်။ တရားခံမှာ အသက် (၂၆) နှစ်အရွယ် Mr. Arnon (ခေါ်) Pu-an ဖြစ်သည်။ အမှု၏ အစမှာ ၂၀၂၃ ခုနှစ်၊ နိုဝင်ဘာလကNakhon Si Thammarat တွင် ဖြစ်ပွားခဲ့ခြင်းဖြစ်သည်။ မူးယစ်ဆေးဝါး အလွန်အကျွံသုံးစွဲထားသော Pu-an သည် မိခင်နှင့် ညီမဖြစ်သူကို ဓားဖြင့်လိုက်ထိုးကာ အိမ်ထဲတွင် ပိတ်လှောင်ထားခဲ့သည်။ သားဖြစ်သူ၏ ရန်ပြုမှုကို ကြောက်ရွံ့ပြီး စိတ်ဖိစီးလွန်းသော မိခင်သည် ဆေးအများအပြားသောက်ကာ မိမိကိုယ်ကို သတ်သေရန် ကြိုးစားခဲ့သည်။ အိမ်နီးချင်းများက ကယ်တင်ရန် ကြိုးစားသော်လည်း၊ Pu-an က ဓားဖြင့်ရွယ်ကာ တားဆီးထားသဖြင့် အချိန်မီ ဆေးကုသခွင့် မရဘဲ မိခင်မှာ ကိုမာ (Coma) အခြေအနေဖြင့် စိုးရိမ်ရသည့် အနေအထားသို့ ရောက်ရှိခဲ့ရသည်။ ထိုစဉ်က ရဲတပ်ဖွဲ့နှင့် ရပ်ကွက်က ဝိုင်းဝန်းဖမ်းဆီးကာ တရားစွဲဆိုခဲ့သော်လည်း၊ Pu-an သည် အာမခံရရှိစဉ် ထွက်ပြေးတိမ်းရှောင်သွားခဲ့သည်။ တစ်နှစ်ကျော်ကြာ ပုန်းအောင်းနေပြီးနောက် ယနေ့ (ဖေဖော်ဝါရီ ၄) တွင် ဆူရတ်ဌာနီ၊ Phunphin ခရိုင်ရှိ ဈေးတစ်ခုတွင် ရာဇဝတ်မှုနှိမ်နင်းရေး တပ်ဖွဲ့က ခြေရာခံ ဖမ်းဆီးနိုင်ခဲ့သည်။