မန္တလေးမြို့တွင် (၇၇) ကြိမ်မြောက် အိန္ဒိယသမ္မတနိုင်ငံတော်နေ့အထိမ်းအမှတ် ညစာစားပွဲအခမ်းအနား ကျင်းပ

(၇၇)ကြိမ်မြောက် အိန္ဒိယသမ္မတနိုင်ငံတော်နေ့ (Republic Day) အထိမ်းအမှတ် ညစာစားပွဲအခမ်းအနားကို ချမ်းအေးသာစံမြို့နယ်ရှိ ibis Style Hotel တွင် ဇန်နဝါရီ ၂၆ ရက် ညပိုင်းက ကျင်းပရာ မန္တလေးတိုင်းဒေသကြီးဝန်ကြီးချုပ်၊ တိုင်းဒေသကြီးတရားလွှတ်တော်တရားသူကြီးချုပ်၊ တိုင်းဒေသကြီးဝန်ကြီးများ၊ မန္တလေးမြို့အခြေစိုက်အိန္ဒိယနိုင်ငံကောင်စစ်ဝန်ချုပ်ရုံးမှ ကောင်စစ်ဝန်ချုပ် H.E. Mr. Sundeep Kaushal နှင့် ဖိတ်ကြားထားသည့် ဧည့်သည်တော်များတက်ရောက်ကြသည်။ဦးစွာ နှစ်နိုင်ငံချစ်ကြည်ရေး နိုင်ငံတော်သီချင်းများဖြင့် ဂုဏ်ပြုအခမ်းအနားကို ဖွင့်လှစ်ပေးပြီး အိန္ဒိယကောင်စစ်ဝန်ချုပ် H.E. Mr. Sundeep Kaushal က နှုတ်ခွန်းဆက်စကားပြောကြားသည်။ယင်းနောက် တိုင်းဒေသကြီးဝန်ကြီးချုပ်က (၇၇)ကြိမ်မြောက် အိန္ဒိယသမ္မတနိုင်ငံတော်နေ့အတွက် ဂုဏ်ပြုစကားနှင့်နှစ်နိုင်ငံအကြား ပိုမိုချစ်ကြည်ရင်းနှီးမှုများ ဆတက်ထမ်းပိုးခိုင်မြဲပါစေကြောင်း ဆုမွန်ကောင်းတောင်းစကားများပြောကြားပြီးနောက် အိန္ဒိယယဉ်ကျေးမှုအဖွဲ့များမှ အိန္ဒိယနိုင်ငံ၏ ရိုးရာယဉ်ကျေးမှုအကများနှင့် တေးသီချင်းသီဆိုမှုများဖြင့် ဂုဏ်ပြုဖျော်ဖြေမှုများကို ကြည့်ရှုအားပေးခဲ့ပြီး ဂုဏ်ပြုမှတ်တမ်းလွှာများပေးအပ်ခဲ့ကြောင်း သိရသည်။