ဆွန်ဟွင်မင်ကို ခြိမ်းခြောက် ငွေညှစ်မှုဖြင့် လူနှစ်ဦးကို တရားဝင် ဖမ်းဆီး

စပါးအသင်း၏ တောင်ကိုရီးယား တိုက်စစ်မှူး ဆွန်ဟွင်မင်အား ငွေညှစ်ရန် ကြိုးပမ်းမှုဖြင့် အမျိုးသမီးတစ်ဦးနှင့် အမျိုးသားတစ်ဦးကို တောင်ကိုရီးယား ရဲတပ်ဖွဲ့က တရားဝင် ဖမ်းဆီးခဲ့ကြောင်း စနေနေ့တွင် အာဏာပိုင်များက ပြောကြားခဲ့သည်။ ဆိုးလ်ဗဟိုခရိုင်တရားရုံးသည် အသက် ၂၀ ကျော် အမျိုးသမီးတစ်ဦးနှင့် အသက် ၄၀ ကျော် အမျိုးသားတစ်ဦးအား ငွေညှစ်မှုနှင့် ငွေညှစ်ရန် ကြိုးပမ်းမှုတို့ဖြင့် ဖမ်းဝရမ်း ထုတ်ပေးခဲ့သည်။ တရားရုံးက ၎င်းတို့အနေဖြင့် ထွက်ပြေးတိမ်းရှောင်ခြင်းနှင့် သက်သေအထောက်အထားများ ဖျက်ဆီးခြင်းတို့ ပြုလုပ်နိုင်ခြေရှိသည်ဟု ဆိုသည်။ အဆိုပါ အမျိုးသမီးသည် ပြီးခဲ့သည့် ဇွန်လတွင် ဆွန်ထံ ချဉ်းကပ်ကာ ၎င်း၏ကလေးကို ကိုယ်ဝန်ဆောင်ထားသည်ဟု မဟုတ်မမှန် ပြောဆိုကာ တိတ်တိတ်နေရန်အတွက် ငွေကြေးတောင်းခံခဲ့သည်ဟု စွပ်စွဲခံထားရသည်။ သူမသည် ဆွန်ထံသို့ ကလေး၏ အာထရာဆောင်းပုံရိပ်ကိုပင် ပေးပို့ခဲ့ပြီး ဝမ် သန်း ၃၀၀ (အမေရိကန်ဒေါ်လာ ၂၁၅,၀၀၀ ခန့်) ရရှိခဲ့သည်ဟု သိရသည်။