ထားဝယ်အထူးစီးပွားရေးဇုန်၊ ရေနက်ဆိပ်ကမ်း စီမံကိန်းအတွက် ရည်ရွယ်၍ တနင်္သာရီတိုင်းအစိုးရက ရုရှားဘာသာစကားသင်တန်းကို ဖွင့်ရန်စီစဉ်နေကြောင်း ဝန်ထမ်းအသိုင်းအဝိုင်းထံမှ သိရသည်။ယင်းသင်တန်းကို အများပြည်သူသိရှိနိုင်ရန် ကြော်ငြာခြင်းမျိုးမဟုတ်ဘဲ ဌာနဆိုင်ရာဝန်ထမ်းများနှင့် တက္ကသိုလ်ကျောင်းသား၊ ကျောင်းသူများကို ဦးစားပေး၍ ခေါ်ယူနေကြောင်း အမည်မဖော်လိုသည့် နီးစပ်သူတစ်ဦးကဆိုသည်။သင်တန်းကို ကျောင်းသားကျောင်းသူများ အတွက် တနင်္လာနေ့မှ သောကြာနေ့အထိ ၉နာရီမှ ၁၂ နာရီအတွင်း ပို့ချမည်ဖြစ်ပြီး ဝန်ထမ်းများအတွက် ညနေ ၄ နာရီခွဲမှ ၆နာရီအတွင်းပို့ချမည့် အပြင် ပိတ်ရက်တွင်လည်း ၉ နာရီ မှ ၁၁ နာရီအထိ နှင့် နေ့လယ် ၁ နာရီ မှ ၃ နာရီအထိ ပို့ချမည်ဟု သင်တန်းအချိန်ဇယားတွင် ဖော်ပြထားသည်။
