ထိုင်းတွင် ငလျင်ကြောင့်ပြိုကျခဲ့သည့် မိုးမျှော်တိုက်ကို စုံစမ်းစစ်ဆေး

မြန်မာနိုင်ငံမှာ လှုပ်ခတ်ခဲ့တဲ့ ပြင်းအား ၇ဒသမ၇ မဂ္ဂနီကျု ငလျင်ကြောင့် ထိုင်းနိုင်ငံ၊ ဘန်ကောက်မြို့က အထပ် ၃၀ မိုးမျှော်တိုက် ပြိုကျခဲ့ရာမှာ တစ်လကြာတဲ့အထိ ပြိုကျရတဲ့အကြောင်းရင်းကို စုံစမ်းစစ်ဆေးနေကြဆဲ ဖြစ်ပါတယ်။ဘန်ကောက်မြောက်ပိုင်းရှိ ပြည်သူ့စာရင်းစစ်ရုံးအသစ်ဖြစ်လာမဲ့ အဲဒီအဆောက်အအုံဟာ မတ်လ ၂၈ ရက် ငလျင်လှုပ်ခတ်မှုမှာ စက္ကန့်ပိုင်းအတွင်းပြိုကျခဲ့ပြီး ဆောက်လုပ်ရေးလုပ်သားပေါင်း ၁၀၃ ယောက် ပိသွားခဲ့တာဖြစ်ပါတယ်။ပြီးခဲ့တဲ့လအတွင်း ထိုင်းအာဏာပိုင်တွေဟာ စက်ယန္တရားအကြီးစားတွေကို သုံးပြီး အပျက်အစီးပုံကြီးကို ရှာဖွေမှုတွေပြုလုပ်ခဲ့ရာမှာ အနည်းဆုံး အလောင်း ၆၃ လောင်း သာတွေ့ရှိခဲ့ပြီး ကျန်အလောင်းတွေကိုတော့ ရှာမတွေ့သေးကြောင်းသိရသည်။