ရှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် ရေခမ်းခြောက်မှု ပိုမိုဆိုးရွာလာသောကြောင့် ဒေသခံများ သွားလာမှု ခက်ခဲဖြစ်နေကြကြောင်း စုံစမ်းသိရှိရသည်။ယခင်က လှေဖြင့်သွားလာရသော အင်းလေးဒေသ ရွာမ ရွာနှင့် မင်းချောင်းရွာ တွင် ယခုလမှ စတင်၍ အပူချိန်မြင့်တက် လာသည်နှင့် အမျှ ရေများခမ်းခြောက်လာပြီး ကုန်းနေရွာသဖွယ် လမ်းများတွင် နှုန်းမြေများဖြင့် ပိတ်ဆို့နေမှုကြောင့် သွားလာရခက်ခဲ နေကြသည်ဟု ဒေသခံများထံမှ သိရသည်။ ထို့အပြင် ယခင်က အင်းလေးဒေသတွင် ရေခမ်းခြောက်ရာတွင် ယခုကဲ့သို့ အခြေနေမဆိုးခဲ့ကြောင်းနှင့် ယခုနှစ်တွင် ရေများခမ်းခြောက်လာသည်မှာ ကျေးရွာပိုများလာနိုင်ကြောင်းသိရပါသည်။
