ကနေဒါ ခရီးသည်တင်လေယာဉ် ဆင်းသက်စဥ် မီးသတ်ကားဖြင့် တိုက်မိပြီး လေယာဉ်မှူးနှစ်ဦး သေဆုံး

အမေရိကန်နိုင်ငံ၊ နယူးယောက်မြို့ရှိ လာဂွာဒီယာ (LaGuardia) လေဆိပ်တွင် ကနေဒါနိုင်ငံ မွန်ထရီရယ်မြို့မှ ပျံသန်းလာသည့် Air Canada Express ခရီးသည်တင်လေယာဉ်တစ်စီး ဆင်းသက်စဉ် ပြေးလမ်းပေါ်ရှိ မီးသတ်ကားတစ်စီးနှင့် တိုက်မိမှုဖြစ်ပွားခဲ့ရာ လေယာဉ်မှူးနှစ်ဦး သေဆုံးသွားကြောင်း သိရသည်။ အဆိုပါ CRJ-900 အမျိုးအစား လေယာဉ်ပေါ်တွင် ခရီးသည် ၇၂ ဦး လိုက်ပါလာခဲ့ပြီး လေယာဉ်ထိပ်ပိုင်း သိသာစွာ ပျက်စီးသွားခဲ့သလို ဒဏ်ရာရရှိသူလည်း အများအပြားရှိကြောင်း NBC News က ဖော်ပြထားသည်။မီးသတ်ယာဉ်မှာ အခြားအခင်းဖြစ်ပွားမှုတစ်ခုကို သွားရောက်ဖြေရှင်းစဉ် ပြေးလမ်းအမှတ် (၄) ပေါ်၌ တိုက်မိခြင်းဖြစ်ပြီး ယာဉ်မောင်းနှင်သည့် ရဲအရာရှိနှစ်ဦးလည်း အရိုးကျိုးဒဏ်ရာများ ရရှိခဲ့သည်။ Flightradar24 ၏ အချက်အလက်များအရ လေယာဉ်မှာ တစ်နာရီ ၂၄ မိုင်နှုန်းခန့်ဖြင့် တိုက်မိခဲ့ခြင်းဖြစ်ပြီး လတ်တလောတွင် လေဆိပ်ကို ပိတ်ထားရကြောင်း သိရှိရပါသည်။