ရခိုင်မှာ အာဆီယံ(ခေါ်)ဘိန်းစာရွက်အပင်တွေကို ခုတ်ထွင်ရှင်းလင်းမှု အရှိန်မြှင့်နေ

ရခိုင်ပြည်နယ်အတွင်းက မြို့၊ ရွာတွေအတွင်း တရားမဝင် စိုက်ပျိုးထားတဲ့ အာဆီယံ(ခေါ်)ဘိန်းစာရွက်အပင်တွေကို လိုက်လံရှာဖွေခုတ်ထွင်ရှင်းလင်းမှုကိုအရှိန်မြှင့်လုပ်ဆောင်နေတယ်လို့ သိရပါတယ်။မြောက်ဦးမြို့နယ် ဒေသခံအမျိုးသမီး မခိုင်စံပယ်ဖြိုးက "တချို့က အဲဒီအပင်တွေကို စီးပွားအဖြစ်စိုက်ပျိုးကြတယ်။ အဲလိုစိုက်ပျိုးတာတော့ မကောင်းဘူး။ ဆေးဖက်ဆိုင်ရာအရ အဲအပင်တွေက သက်ကြီးပိုင်းတွေအတွက်‌ အသုံးပြုတာတော့ ကောင်းပါတယ်။ ဒါပေမယ့် တချို့က ဆေးဝါးအဖြစ် ကုထုံးလုပ်ပြီးတော့ မူးယစ်စေတဲ့ ဘိန်းအဖြစ်အသုံးပြုတာတော့ အများကြီးမြင်မိတယ်။ အဆိုးဆုံးက ကလေးတွေကအစ သုံးစွဲလာကြတယ်။ ဉာဏ်ရည်တွေ ထိခိုက်ပြီးတော့ အနာဂတ်ကြယ်ပွင့်လေးတွေအတွက် လမ်းပျောက်သွားမှာကိုတော့ ကြောက်မိပါတယ်"လို့ ပြောပါတယ်။