ကရင်၊ မွန်နှင့် ရှမ်းပြည်နယ်တို့တွင် ဇန်နဝါရီလ၏ ပျမ်းမျှအပူချိန်ထက် ပိုမိုအေးမြနိုင်

မိုးလေဝသနှင့် ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ ဇန်နဝါရီလ ၁၁ ရက်မှ ၂၀ ရက်အတွင်း ကရင်ပြည်နယ်၊ မွန်ပြည်နယ်နှင့် ရှမ်းပြည်နယ် (အရှေ့ပိုင်း) တို့တွင် ဇန်နဝါရီလ၏ ပျမ်းမျှအပူချိန်အောက် ၁ ဒသမ ၅ ဒီဂရီဆဲလ်စီးယပ်ခန့်အထိ လျော့နည်းအေးမြနိုင်ပြီး ကျန်တိုင်းဒေသကြီးနှင့် ပြည်နယ်များတွင်မူ ပျမ်းမျှအပူချိန်ခန့်သာ ရှိနိုင်ကြောင်း သိရသည်။ ထို့ပြင် ဒေသအများအပြားတွင် ၁ ရက်မှ ၁၀ ရက်ခန့်အထိ မြူထူများ ဆိုင်းနိုင်သဖြင့် လေထုညစ်ညမ်းမှုကြောင့်ဖြစ်ပွားသော အသက်ရှူလမ်းကြောင်းနှင့် နှလုံးသွေးကြောဆိုင်ရာ ကျန်းမာရေးပြဿနာများကို သတိပြုရန် ဆရာဝန်များက အကြံပြုထားသည်။ လတ်တလောတွင် အားအနည်းငယ်ရှိသော "လာနီညာ" အဆင့်၌ တည်ရှိနေသဖြင့် ညအပူချိန် လျော့နည်းခြင်း၊ လေဖိအားနည်းရပ်ဝန်းများ ဖြစ်ပေါ်နိုင်ခြင်းနှင့် အချိန်အခါမဟုတ် မိုးရွာသွန်းခြင်းများ ဖြစ်ပေါ်နိုင်ကြောင်း သတိပေးနှိုးဆော်ထားပါသည်။