ထိုင်းမြန်မာနယ်စပ်မဲဆောက်-ဘန်ကောက် ယာဥ်လိုင်းမှာ ဘတ်စ်ကားအသစ် တစ်စီးနဲ့ ထပ်မံတိုးချဲ့ပြေးဆွဲသွားမည်

ထိုင်းမြန်မာနယ်စပ် မဲဆောက်မြို့ကနေ ဘန်ကောက်မြို့ကို ပြေးဆွဲတဲ့ ဘောခေါစော ၉၉၉ ယာဥ်လိုင်းဟာ ဘတ်စ်ကားအသစ်တစ်စင်း တိုးချဲ့ပြေးဆွဲထားလျက်ရှိပါတယ်။ 12Go အွန်လိုင်းကားလက်မှတ်ဝယ်ယူရေးဝက်ဘ်ဆိုဒ်ရဲ့ အချက်အလက်အရ မဲဆောက်-ဘန်ကောက် ဘောခေါစော ၉၉၉ ယာဥ်လိုင်းပြေးဆွဲချိန်ဟာ မနက် ၈ နာရီတစ်ကြိမ်၊ မနက် ၈ နာရီခွဲတစ်ကြိမ်နှင့် ည ၇ နာရီ တစ်ကြိမ်တို့ စုစုပေါင်း ၃ ကြိမ်အထိရှိပါတယ်။ထိုင်းမြန်မာနယ်စပ် မဲဆောက်မြို့မှ ဘန်ကောက်မြို့ကို ဘတ်စ်ကားနဲ့ သွားမယ်ဆိုရင် အချိန် ၉ နာရီခန့် အထိကြာမြင့်ပြီး မဲဆောက်-ဘန်ကောက် နေ့စဥ်ပြေးဆွဲတဲ့ ခရီးစဥ်အကြိမ်ရေဟာ အခြားခရီးစဥ်တွေထက်လည်း ပိုများပြားတယ်လို့ Border Echo မှ စုံစမ်းသိရှိရပါတယ်။ မဲဆောက်ကားဝင်းကနေ ဘန်ကောက်မြို့အထိ ပြေးဆွဲတဲ့ဘတ်စ်ကားတွေဟာ ဘောခေါစော ၉၉၉ ယာဥ်လိုင်းတစ်ခုတည်းသာမဟုတ်ပဲ အခြားလိုင်းတွေလည်းရှိသလို ဆိုက်ရောက်/ထွက်ခွာချိန် နှင့် ဈေးနှုန်းတွေကတော့ ကုမ္ပဏီအလိုက် ကွဲပြားတာလည်းဖြစ်ပါတယ်။